Le tango du cachalot

D'pus qu'alle a su par la radio
Qu'eul patois du Nord i venot
Ed'l'occupation espagnole
M'tante qui étot si comm'i faut
Cha li a monté au cerveau
A f'sot mourir l'oncle Anatole
In l'ravisant alle li trouvot
Des airs d'Rudolphe Valentino
Alle en dev'not complèt'mint folle
Et ch'est au bieau milieu d'eune nuit
Qu'in l'réveillant alle li a dit:
"Non mais dis-donc, ti té rigoles
Puisque t'as du sang d'hidalgo
Té dos savoir dinser l'tango
Apprinds-me cha vite, au boulot

Allons Philomène, t'es d'jà hors d'haleine
T'es comme eune baleine, arrête euch'phono
Mets-te cha dins t'tiête, l'tango des fauvettes
Cha fait trop bebête, avec tes chent ving kilos
Ah ch'est comme cha, qu'alle li a dit
Fais-me z'in un qui s'ra pus bieau, cha s'ra l'tango du cachalot

Cha peut, bien sûr paraître idiot
Mais le lend'main m'n'oncle i parlot
L'français comme eune vaque espagnole
Au fond d'eul'fosse il expliquot
Aux ouvriers, aux galibots
Joingnant le geste à la parole
Qué pour bien danser lé tango
Comme on le fait à Bilbao
Faut d'l'a molesse dins les épaules
Qué pour lé faire comme i faut
Faut d'la cambrure dans le dos
De la souplesse dins les guiboles
Tout in gardant bien lé tempo
On se tient comme lé toréro
Qui va combattre le taureau

Et joue contre joue, comme les Andalous
Autour des barrous, cha y allot l'tango
Oui mais les molettes, les v'là qu'is s'arrêtent
Y avot pus d'gaillettes, dins tout l'fosse in dansot
In s'y attendot, che fut la guerre
Dins les bureaux z'avottent pas quère, l'air du tango du cachalot

Cha fait du foin sur le carreau
Et les amindes cha quéyot
Z'ont rinvoyé l'oncle Anatole
Dins les cités cha murmurot
Qu'in arprindot pas l'boulot
Si in rindot pas leu idole
Dins les arrières salles eud'bistrot
Eul'syndicat s'réunichot
Contre les libertés qu'in viole
Veyant l'tournure que cha a pris
Tout d'un cop m'n'oncle i leur a dit
Laisser tomber, j'monte eune école
Is vont tertous l'avoir dins'l'dos
Pour mi avoir eul'dernier mot
J'vas donner des cours eud'tango

Pour vir Philomène, les salles y'étottent pleines
Payant à l'quinzaine, i v'not l'populo
Les vieux vous diront, qu'dins tous les corons
Les bandonéons, f'sottent dinser l'tango
In raconte cor, dins les veillées
Ch't'un gars du Nord qui'a inventé l'fameux tango du cachalot

(Edmond Tanière)